Hagstofan sendi frá sér skýrslu í dag sem segir okkur frá því að 95% Íslendinga á aldrinum 16-74 ára notuðu internetið allavega einu sinni fyrstu 4 mánuði ársins 2011.

Af þessum “netnotendum” nota svo 93% netið á hverjum degi og önnur 6% að minnsta kosti einu sinni í viku. Heildartalan er semsagt sú að 94% Íslendinga nota internetið reglulega. Við erum ein netvæddasta þjóð í heimi og skríðum frekar stöðugt í áttina að 100% netnotkun.

26% aðspurðra nota símann sinn til þess að fara á netið.

Þú getur lesið alla skýrsluna hér: https://hagstofa.is/lisalib/getfile.aspx?ItemID=12638

Tækni- og netvæðingin hefur nú þegar gjörbreytt því hvernig við stundum viðskipti og þetta umhverfi kemur til með að halda áfram að stökkbreytast á næstu árum.

Ég var 4 eða 5 ára þegar ég settist fyrir framan PC tölvu og spilaði Space Invaders í fyrsta skipti og ég verð þrítugur á næsta ári! Í dag er það að kunna á tölvu og að nota internetið svipað og það að kunna að lesa. Ef þú kannt það ekki (eða kannt það en nýtir þér það ekki) þá verður þú líklegast eftir á á einhverjum sviðum.

Með því að nýta þau gríðarlega öflugu og sniðugu verkfæri sem eru í boði á netinu get ég unnið hvaðan sem er. Ef tölvan mín hrynur þá þarf ég bara að komast í aðra tölvu með nettengingu og ég get haldið áfram með daginn.

Ert þú ekki örugglega að nýta þér internetið til fulls?

Af hverju www.atvinna.is?

Fyrirtækið Draumastörf ehf var stofnað í kringum síðuna www.atvinna.is vegna þess að við sáum þörf fyrir öfluga atvinnusíðu á Íslandi.

Eftir að hafa búið erlendis síðastliðin 8 ár og svalað ævintýraþörfinni fannst okkur kominn tími til að snúa aftur heim á ástkæra Íslandið okkar. Eftir að ákvörðunin var tekin var næsta skref að segja upp störfunum okkar og kanna hvaða möguleikar biðu okkar á Íslandi. Þar komumst við í vanda. Í stað þess að rata inn á eina vefsíðu sem hafði að geyma flest öll störf í boði ásamt viðeigandi upplýsingum, eins og við áttum að venjast í þeim löndum sem við höfðum búið í, tók á móti okkur frumskógur af misjöfnum og misgóðum miðlum sem þessi störf virtust deilast niður á. Það var því full vinna að finna vinnur í boði!

Þannig kviknaði hugmyndin um að koma af stað síðu sem ekki aðeins leysir þennan vanda heldur auðveldar einnig atvinnurekendum og ráðningarstofum að velja úr hæfustu umsækjendurna.

Á Íslandi er hafsjór af ótrúlega hæfu fólki og það er mikilvægt að atvinnurekendur hafi aðgang að þessari gullnámu sem þessir atvinnuleitendur eru. Þess vegna er síðan okkar gerð fyrir þessa tvo hópa.

Við höfum margvíslega reynslu úr atvinnulífinu auk menntunar sem hefur reynst okkur vel við þetta verkefni.

Danni hefur meðal annars unnið hjá tveimur stærstu tölvufyrirtækjum í heimi, Hewlett Packard og Dell, en þess má geta að starfsfólk Hewlett Packard um allan heim er svipað margt og allir íbúar Íslands!

Auk þess að hafa unnið við viðskiptatengsl og markaðssetningu á netinu er Danni einnig með þónokkrar Microsoft gráður og diploma í viðskiptafræði.

Íris er viðskiptafræðingur og með diploma í markaðsfræði. Íris hefur unnið talsvert við markaðssetningu og viðskiptatengsl hjá alþjóðlegum fyrirtækjum auk þess að hafa starfað við mannauðsstjórnun og  áætlanagerð.

Það er von okkar og markmið fyrirtækisins að hjálpa til við að byggja upp bjarta framtíð á íslenskum atvinnumarkaði!

Við viljum þakka frábærar viðtökur og vonumst til þess að sem flestir notfæri sér síðuna svo hægt sé að byggja upp öflugt samfélag í kringum íslenska atvinnumarkaðinn.

Kveðja,

Danni og Íris